அலுவல் முடித்து
மெட்ரோ பணிகள்
நடைபெறும் சாலையில்
'எப்பா போப்பா' என
நெரிசலில் வாகனத்தை
நகர்த்தி வீடு வந்து
சேர்ந்தால்
'எப்பா வாப்பா' என
விளையாட அழைப்பாள் !
வெற்றி தோல்வி இல்லாத
மகிழ்ச்சி மட்டும்
தரும் விளையாட்டுகள்
மகளின் கண்டுபிடிப்பு !!!
***
வெள்ளிக்கிழமைகள் என்றும்
மகிழ்வை தரும்
அடுத்த இரு நாட்கள்
விடுமுறை என்பதால் !
அவளும் மகிழ்வாள்
அவளின் வேலை விகிதத்தில்
எந்த மாற்றமும் இல்லை
என்றாலும்
காலையில் எழுந்து கொள்ளும்
கால அட்டவணை
மாறுவதால் !!!
***
திருமண அழைப்பிதழில்
மணமக்களின் தாத்தா
பேரை பார்த்ததும்
உதட்டோரம் ஒரு புன்னகை
உதயமானது
எனக்குள் இருக்கும்
சாதி பாசத்தால் !!!
***
எவ்வளவு போதையில்
இருந்தாலும் மனைவி
சொன்ன காய்கறிகளை
வாங்குவான் !
மதுக்கடை அருகில்
தள்ளுவண்டி காய்கறி
வியாபார தந்திரம் !!!
***
படித்த நாயே இங்கு
குப்பை கொட்டாதே என்று
எழுதியிருந்த இடத்தில்
படித்த நாயே எங்கு
குப்பை கொட்ட வேண்டும் ?
என்று எழுதி சென்றான்
அந்த போராளி !!!
***
அகவை 58 ஆனபின்
அடிக்கடி மகனின்
மாநகர் வீட்டுக்கு வருவதாக
சொன்னாள் அம்மா!
ரயில் கட்டணம்
பாதி என்பதால் !
அம்மாவுக்கு 58 ஆகும் போது
அரசியல்வாதிக்கும்
வயதாகி இருந்தது !!!
***
பள்ளி வளாகம்
சுத்தம் செய்யப்பட்டது !
சுவர்களில் வர்ணம்
பூசப்பட்டது !
மைதானத்தில் இருந்த
காட்டு செடிகளும்
கருவேலம் புதர்களும்
அகற்றப்பட்டது !
சாலையில் இருந்த
புழுதியின் சுவடு
தெரியவில்லை !
முதல்வரின் திடீர்
வருகைக்காக அரசுப்பள்ளி
ஆபரணங்கள் அணிந்து
கொண்டது !!!
***
No comments:
Post a Comment