1. எப்போது இந்த பழக்கம் துவங்கியது ?
2012 முதல் நான் சேகரிக்க துவங்கினேன். அப்போது தான் கம்பெனியில் எனக்கு இன்டர்நெட் கிடைத்தது. ஈபேவில் குறைந்த விலையில் கிடைத்த நோட்டுகளை வாங்கினேன். வெளிநாட்டில் இருக்கும் நண்பர்களிடம் சொல்லி வைக்க துவங்கினேன். ஈபே இந்தியா நிறுத்தப்பட்டபின் வாட்சப், பேஸ்புக் க்ரூப்கள் மூலம் தொடர்கிறது.
2. நண்பர்கள் உதவினார்களா?
நன்றாக உதவினார்கள். அவர்கள் கிளம்பும் சூழல் பணியிட சிக்கல் காரணமாக எல்லாராலும் கொண்டு வர முடியாது. கிட்டதட்ட நாற்பது நோட்டுகள் நண்பர்கள் தந்தது. டெல்லி நண்பர்கள் கூட என் கையில் கிடைக்கும்படி செய்தார்கள்.
3. நண்பர்கள் கொடுத்ததில் காஸ்ட்லியான நோட்டு எது?
நண்பர்கள் கொடுத்தது எல்லாமே உயர்வானது தான். நண்பர்கள் யார் யார் என்னென்ன நோட்டுகள் கொடுத்தார்கள் என்பதை பற்றிய வீடியோவை யுடியூப் தளத்தில் விரைவில் வெளியிடுகிறேன்.
நண்பர்கள் கொடுத்ததில் அரிதான நோட்டு என்றால் நண்பர் மோகித் தந்த ரொடிஷியா நாட்டு நோட்டு.
4. உங்கள் சேகரிப்பு பற்றி தகவல்கள்
என்னிடம் 650க்கு மேற்பட்ட நோட்டுகள் உள்ளன.
200க்கும் மேற்பட்ட நாட்டு நோட்டுகளை சேகரித்துள்ளேன்.
40க்கும் மேற்பட்ட பாலிமர் நோட்டுகள் உள்ளன.
ஒரு பக்கம் மட்டுமே அச்சிடப்பட்ட இரு நோட்டுகள் உள்ளது.
அதிகபட்சமாக ஜிம்பாப்வே நாட்டின் நோட்டுகள் 50க்கும் அதிகமாக உள்ளது.
இலக்கம் ஒன்று என்ற மதிப்புள்ள நோட்டுகள் 80க்கும் அதிகமாக உள்ளது.
ஒரு நோட்டு போல்டருடன் உள்ளது.
5. ரொம்ப நாட்களாக வாங்க நினைக்கும் நோட்டுகள் ?
'கடங்கா'னு ஒரு நாடு 1960 - 1963 வரை இருந்துச்சு. அங்கீகரிக்கப்படாத நாடு. 1963ல காங்கோவோட இணைந்து விட்டது. மொத்தமே 9 வகையான நோட்டுகள் வெளியிட்டுள்ளனர். நோட்டின் தன்மையை பொறுத்து 10000 முதல் 32000 வரை விற்கப்படுகிறது. அதை வாங்க லக்கி ப்ரைஸ் அடித்தால் தான் உண்டு.
தஞ்சை பெரிய கோயில் படத்தோடு வெளியிடப்பட்ட பழைய 1000 ரூபாய் நோட்டு 16000க்கு கிடைக்கிறது.
அப்புறம் பர்படாஸ் 5 டாலர் நோட்டு. கிரிக்கெட் வீரர் இடம்பெற்ற ஒரே நோட்டு என்பதால்.
6. நம்மூரிலே கள்ள நோட்டு வருகிறது, வெளிநாட்டு நோட்டுகளில் கள்ள நோட்டை எப்படி கண்டுபிடிப்பது?
சற்றே சிரமம் தான். குறைந்த விலையில் விற்கப்படும் நோட்டுகளில் கள்ள நோட்டு வர வாய்ப்பில்லை. வாட்டர் மார்க், செக்யூரிட்டி த்ரெட் இவற்றை வைத்து நம்பலாம்.
பெரிய விலை கொடுத்து வாங்கும் போது நம்பகமான டீலர்களிடம் வாங்குவது நல்லது.
பேங்க் நோட்டு சொசைட்டிகள் உள்ளன. அங்கு அனுப்பி நோட்டின் நம்பகத்தன்மையை அறியலாம். ஆனால் அதற்காகும் கட்டணம் மற்றும் தபால் செலவு 15000 வரை ஆகும். சில சேகரிப்பாளர்கள் இதை செய்து சான்றிதழ் வாங்கி வைத்து கொள்கிறார்கள்.
7. இந்த பழக்கத்திற்கு எதிர்ப்புகள் / கேலிகள் ஏதாவது உண்டா?
எதிர்ப்புகள் என்று எதுவும் இல்லை. என் மனைவி என் ஆசைகளை தடுப்பதில்லை. நண்பர்களும் அப்படி தான்.
ஒரு சிலர் பணம் கொடுத்து பணத்தை வாங்குகிறீர்கள் என்று கிண்டல் செய்வதுண்டு.
சிலர் வருங்காலத்தில் பெரிய விலைக்கு விற்க இதை வாங்குகிறீர்களா என்று கேட்பதுண்டு. நான் இதை ஹாபியாகவே செய்கிறேன். என்னிடம் கூடுதலாக உள்ள நோட்டுகளை விற்க ஆசை உண்டு. ஆனால் விற்கும் போது குறிப்பிட்ட நேரத்தில் வாங்குபவர் கையில் கிடைக்கும் வரை பொறுப்பு நம்முடையது. அதற்கான பேக் செய்து போஸ்ட் ஆபிஸ் வரை செல்ல நேரம் கிடையாது.
8. பழைய நோட்டுகள் லட்சக்கணக்கில் விற்கப்படுவது உண்மையா?
இது பற்றி ஒரு சின்ன புரிதல் வேண்டும். சேகரிப்பாளர்களும் சாதாரண மனிதர்களே.
அவர்களுக்கு வாங்கும் சக்தி என்று ஒன்று இருக்கிறதே.
எல்லா நோட்டுகளுக்கு கேட்டாக்கில் (Catalogue) தற்போதைய சந்தை மதிப்பு உள்ளது. இந்தியாவில் 1949-1957 ல் 10000 ரூபாய் நோட்டு வெளியிடப்பட்டது. அந்த காலகட்டத்தில் 10000 ரூபாய் சம்பளம் வாங்கியவர்கள் மிகக் குறைவே. இவ்வளவு அரிதான அந்த நோட்டின் விலை கேட்டலாக்படி நல்ல கண்டிசன் நோட்டு 5000 டாலர் (3.75 லட்சம்) மிக நல்ல கண்டிசன் நோட்டு 10000 டாலர்(7 லட்சம்).
சில சந்தை வியாபாரிகள் சில நோட்டுகளை அரிதாக்கி உயர்ந்த விலைக்கு விற்கும் நிலை உள்ளது. உதாரணமாக 2016 செப்டம்பரில் உர்ஜித் பட்டேல் ரிசர்வ் வங்கி கவர்னர் ஆனார். அவர் கையெழுத்தில் 2016ம் ஆண்டு வந்த 10 ரூபாய் நோட்டுகள் மிக குறைவு. அவை இப்போது 300 ரூபாய்க்கு விற்கப்படுகிறது. ஏதாவது கவர்னர் ஒரு குறிப்பிட்ட ஆண்டில் குறுகிய காலம் பதவி வகித்தால் அந்த நோட்டுகளை பதுக்கும் போக்கு உள்ளது.
ஆக பழைய நோட்டுகள் லட்சக்கணக்கில் போகும் என்பது டுபாக்கூர் வேலை.
9. இந்த சேகரிப்பு மூலம் தெரிந்து கொண்டது என்ன?
நிறைய அறிவுசார் விசயங்களை தெரிந்து கொண்டேன். ஒவ்வொரு நாடும் எங்கே இருக்கிறது. ஒவ்வொரு நோட்டின் சின்ன சின்ன விவரணைகள் மூலமாக அந்த நாட்டின் வரலாறு, பண்பாடு, தொழில்வளம் பற்றி தெரிந்து கொண்டேன். இன்னும் கற்று கொண்டே இருக்கிறேன்.
சர்வாதிகாரிகளாக நாம் செய்தி மூலம் அறிந்து கொண்ட இடி அமீன், சதாம் உசேன், ராஜபச்சே இவர்கள் படங்கள் போட்டு கூட நோட்டுகள் வந்துள்ளது.
10. புதிதாக இந்த ஹாபிக்கு வருபவர்களுக்கு நீங்கள் சொல்வது?
சின்ன வயதிலேயே தபால் தலை, நாணயங்கள், பேங்க் நோட்டுகள் சேகரிக்க தொடங்கினால் நிறைய தெரிந்து கொள்ளலாம்.
எல்லாவற்றையும் சேர்த்து செய்யாதீர்கள் அது மிக கடினம். எப்படி சேகரிப்பது, எப்படி பாதுகாப்பது என்பது பற்றி தெரிந்து களம் இறங்குங்கள்.
தெரியாமல் களத்தில் இறங்கி பணத்தை விரயம் செய்ய வேண்டாம்.
