திருநெல்வேலி விவசாயம் சார்ந்த மாநிலம். அதே சமயம் பெண்களுக்கு கைத்தொழில் என்றால் பீடி சுற்றுதல். பீடி சுற்றுவதில் பெரிய வருமானம் இருக்காது என்றாலும், தங்களுக்கு கிடைக்கும் நேரத்தில் பீடி சுற்றி சின்ன சின்ன குடும்பத் தேவைகள் முதல் குழந்தைகளின் படிப்பு செலவுகள் வரை பூர்த்தி செய்ய பயன்படும்.
பீடி கடை உரிமையாளர்கள் 100 கிராம் பீடித்தூள் + 1/4 கிலோ பீடி இலை என்ற விகிதத்தில் வழங்குவார்கள். பீடி சுற்றும் நபர் 25 பீடிகள் கொண்ட 23 கட்டுகளை கொடுக்க வேண்டும். அதில் 22 கட்டுகள் வரவு வைக்கப்பட்டு சம்பளம் வழங்கப்படும். குறைவான கட்டுகள் கொடுத்தால் மீதி கட்டுகள் பாக்கியாக எழுதப்படும். பாக்கி கட்டுகளுக்கு காசு கொடுத்து இலை மற்றும் தூள் வாங்கி கட்டி கொடுத்து கழிக்க வேண்டும்.
பீடித் தொழிலாளர் நல வாரியம் உள்ளது. அது 1000 பீடிக்கு நிர்ணயித்த கூலியை (40x25) பீடிக்கடை உரிமையாளர்கள் (46x25) 1150 பீடிகளுக்கு வழங்குகிறார்கள். பீடித் தொழிலாளர் குழந்தைகளுக்கு பள்ளியில் உதவித்தொகை உண்டு. இது அரசு உதவித்தொகையைவிட அதிகம். பீடி உதவித்தொகை வாங்கினால் அரசு உதவித்தொகை கிடைக்காது.
பீடி சுற்றும் முறைக்கு வருவோம். பீடி இலை பார்க்க தேக்கு இலை போல் இருக்கும். இலையை தண்ணீர் தெளித்து நனையவிட்டு விடுவார்கள். அதற்கு பிறகு ஈரத்தை உதறி அளவுக்கு வெட்டுவார்கள். பழுப்பு நிற இலைகளில் பீடி சுற்றக்கூடாது. ஒவ்வொரு கட்டிலும் மேலும் கீழும் இரண்டு அல்லது மூன்று பழுப்பு நிற இலைகள் இருக்கும்.
வெட்டிய இலைகளை கவரில் வைத்து பீடி சுற்ற துவங்குவார்கள். இதற்கு இடையில் பீடியை கட்டுவதற்கான நூலை பிரித்து எடுக்கும் வேலை உள்ளது. வெட்டிய இலைகளில் சிறிய கத்தி கொண்டு நரம்புகளை சீவி விட்டு, பீடித்தூளை வைத்து சுருட்டுவார்கள்.
பீடியின் தலைப்பகுதியில் வால்பகுதி வரை பீடித்தூளை சீராக குறைத்து வர வேண்டும். தலைப்பகுதியில் தூள் அதிகம் இருந்தால் பீடி ஏற்றுக்கொள்ளபடாது. வால் பகுதியில் தூள் இல்லை என்றாலும் கட்டமுடியாது.
அடுத்த வேலை தலைப்பகுதியை மடக்குவது. இதற்கென அளவுபார்க்க ஒரு கட்டை உண்டு, அளவு பார்த்து கூடுதல் நீளத்தை வெட்டி, ஸ்குரு டிரைவர்(மடக்குச்சி) போன்ற கருவி கொண்டு மடக்குவார்கள் மடக்குவதற்கு ஏதுவாக பீடியின் தலை பகுதியை ஈரத்துணியால் மூடி வைத்திருப்பார்கள். இதற்கு பெயர் பதியம். அதிக நேரம் மூடி வைத்திருந்தால் பீடி கருத்துவிடும்.
மடக்கிய பீடிகளை 25 எண்ணம் (கடைக்கு கடை எண்ணிக்கை மாறலாம்) கொண்ட கட்டுகளாக கட்டவேண்டும். கட்டிய பின் சைஸ் பார்த்து செக்பண்ணி கடையில் கொடுக்க வேண்டும்.
பீடிக்கடை வைத்திருக்கும் நபர் பீடியின் தரத்தை வைத்து பீடியை கழிப்பார்கள். தரம் இல்லை என முழுக்கட்டையும் திருகி எறியவும் வாய்ப்பு உள்ளது.
சமையல் முடித்து குழந்தைகளை பள்ளிக்கு அனுப்பி ஓய்வு நேரத்தின் உழைப்பை பீடியாக மாற்றுவார்கள். பீடித்தூள் நெடியுடையுது, சுவாச பிரச்சினைகளை ஏற்படுத்தும் வாய்ப்பு உடையது. ஆனாலும் எப்எம் ரேடியோவில் பாட்டு கேட்டுக்கொண்டே போட்டி போட்டு பீடி சுற்றுவார்கள்.
திருநெல்வேலியும் பீடித்தொழிலும் பிரிக்க முடியாதவை.
No comments:
Post a Comment