அப்பாவோடு கயத்தார் - செட்டிகுறிச்சி
தனியார் பேருந்தில்
சென்ற போது அந்த ஓட்டுனர்
கையில் சிக்கி தவித்த
கியர் ராடு ரசிக்க வைத்தது
கிறங்கடித்த பயணம் !
முத்து நகர் விரைவுவண்டியில்
மாலை போட்ட இரு நண்பர்கள்,
இரு இளம் பெண்கள்
எதிரிருக்கையில் என
இரண்டாம் வகுப்பில்
எழும்பூர் வந்தது
ரசனைமிகு ரயில் பயணம் !
அலுவல் நிமித்தமாக
அலுவலக நண்பருடன்
புனே சென்றது
மனதில் நீங்கா விமான பயணம் !
சத்திஸ்கர் மாநிலத்தில் காடு
மேடாய் கிடக்கும்
நெடுஞ்சாலையில் ஆறு
மணி நேரம் காரில்
பயணித்தது அழகான பயணம் !
நொய்டாவில் கடும்குளிரில்
கைரிக்ஷாவில் பயணித்தது
குளிரான பயணம் !
பள்ளி நாட்களில்
கடன் வாங்கிய மிதிவண்டியில்
காட்டு காளியம்மன் கோவில்
சென்றது சுகமான பயணம் !
நண்பனின் இருசக்கர
வாகனத்தில் சென்று
மலையேறி
மகிழ்ந்த தடா அருவி
மகத்தான பயணம் !
நீண்ட நேரம் பேருந்து
வரவில்லை என்றால்
தரமணி - வேளச்சேரி
செல்லும் ஷேர் ஆட்டோ
சலிப்பான பயணம் !
அதிக சத்தத்தில்
லச்சாவதியே பாடலை
ஒலிக்க விட்டு குமாரகோயில் விலக்கு -
கல்லூரி வரை ஜீப்பில் தொங்கி
சென்றது நினைவில்
நீங்கா பயணம் !
தக்கலை - கல்லூரி வரை
தொங்கியது இல்லையென்றாலும்
அழகி சிற்றுந்தில் சென்றது
சிறப்பான பயணம் !
ரவுடி மணி அப்பாவோட
தார்கம்பை கையில்
பிடித்தபடி சென்றது
மாஸான மாட்டு வண்டி பயணம் !
இரவு பணி முடிந்து
இருள் விலகா காலைகளில்
ஏதாவது பேருந்து நிலையத்தில்
லாரியில் வந்து இறங்கியது
இன்பமிகு பயணம் !
மயிலாப்பூர் கோவிலுக்கு
மனைவியோடு ஆட்டோவில்
பயணித்தது
ஆனந்த பயணம் !
பால்யத்தில் பனங்காய்
வண்டியில் இலக்கில்லாமல்
கற்பனையில் பயணித்தது
திகட்டாத பயணம் !!!
Super na
ReplyDelete