தீப்பெட்டி சேகரிப்பு

பணத்தாள் சேகரிக்கும் நான் தீப்பெட்டி சேகரிப்பிலும் இறங்கிவிட்டேன். பணத்தாள் சேகரிக்கும் போது தீப்பெட்டி சேகரிப்பாளரை பார்த்து என்னடா இது என்று நானே நினைத்துள்ளேன். 

இன்றைய தேதியில் ஒரு ரூபாய்க்கு கிடைக்கும் பொருட்களில் தீப்பெட்டியும் ஒன்று. 20 முதல் 25 குச்சிகள் ஒரு தீப்பெட்டியில் இருக்கும். ஒரு தீக்குச்சி விலை 4 பைசா முதல் 5 பைசா. ஒரு தீக்குச்சியை வைத்து ஒரு சிகரெட் / பீடி பத்த வைக்கலாம். தீபம் ஏற்றலாம், அடுப்பு பற்ற வைக்கலாம், வைக்கோல் படப்பையோ அல்லது குப்பையையோ கொளுத்தலாம். 

இன்று தீப்பெட்டி தயாரிப்பு பெரும்பாலும் இயந்திரம் மூலம் நடைபெறுகிறது. இதில் மூன்று தனித்தனி வேலைகள் உள்ளது. வெளி பெட்டி (அட்டை), உள் பெட்டி (அட்டை), தீக்குச்சிகள். இன்று தீப்பெட்டியின் வெளியில் இருக்கும் படம் அட்டையில் அச்சிடப்பட்டே வருகிறது. தொழில்நுட்பம் வளர்ச்சி அடையாத காலத்தில் அந்த படங்களை பசை கொண்டு ஒட்டினார்கள். அதே போல் தீக்குச்சி உரசும் கத்தரிப்பூ கலர் இடமும் பசையால் ஒட்டப்பட்டது தான். 

இவ்வளவு வேலை பார்த்து நுகர்வோர் கைக்கு வரும் போது 1 ரூபாய் விலையில் கிடைக்கும் தீப்பெட்டிக்கு, தொழிலாளருக்கு எவ்வளவு கூலி கிடைத்திருக்கும். 

80, 90களின் குழவிகள் தீப்பெட்டி அட்டையை கதவில் ஒட்டி விளையாடி இருப்பார்கள். தீப்பெட்டியில் பட்டுப்பூச்சியை போட்டு வைத்திருப்பார்கள். இன்னும் தீப்பெட்டியை வைத்து ஏதேதோ விளையாடி இருப்பார்கள். 

தீப்பெட்டி எப்படி முக்கியத்துவம் பெறுகிறது? மனிதன் கண்டுபிடிப்பில் மகத்தான கண்டுபடிப்பு நெருப்பு. அந்த நெருப்பை உருவாக்குவது தான் தீப்பெட்டி. முன் காலத்தில் வீட்டில் நெருப்பை அணையாமல் பார்த்துக் கொண்டனர். அக்கம்பக்கத்தினர் வீட்டிற்கு நெருப்பு கேட்டு சென்றனர். 

தீப்பெட்டி அதை எளிமையாக்கியது. எல்லாரும் ஏதோ ஒரு சூழலில் யாரிடமாவது தீப்பெட்டி கடன் கேட்டிருக்க வாய்ப்பு உள்ளது.  சிகரெட் பிடிக்கவோ, தீபம் ஏற்றவோ, குப்பையைக் கொளுத்தவோ கூட இருக்கலாம். 

தீப்பெட்டி உற்பத்தியில் பெரும்பங்கு கோவில்பட்டி, சாத்தூர், சிவகாசி பகுதியில் இருந்து தான். இந்தியா முழுக்க மற்றும் வெளிநாடுகளுக்கு இங்கிருந்து தான் தீப்பெட்டி செல்கிறது. குடியாத்தம், காவேரிப்பாக்கம் பகுதியிலும் பெரிய அளவில் தீப்பெட்டி தொழில் நடைபெறுகிறது. 

திருநெல்வேலியில் பாரம்பரிய தீப்பெட்டி என்றால் அது கிஸான் தான். ஏர் பிடித்த உழவன் இருப்பது போல் இருக்கும் படம் தான் அந்த தீப்பெட்டியில் இருக்கும். கிஸான் தமிழ்சொல்லே கிடையாது ஆனாலும் அந்தப் பெயரில் உள்ள தீப்பெட்டி தான் திருநெல்வேலி முழுக்க பரவலாக உள்ளது. தற்போது கார்ப்பரேட் ஐடிசி தீப்பெட்டி விற்பனையிலும் இறங்கி உள்ளது. ஷிப், ஹோம் லைட்ஸ், சீட்டா, எய்ம் அவர்களது தீப்பெட்டி தான். இவ்வளவு போட்டியிலும் கிஸான் இன்னும் களத்தில் இருப்பது ஆச்சர்யம் தான். 

தீப்பெட்டியை பொறுத்தவரை கால மாற்றத்திற்கு ஏற்ப பெயர்கள், படங்களை மாற்றி கொண்டே இருப்பார்கள். கிரிக்கெட்டை மையப்படுத்தி, நடிகர், நடிகைகளை மையப்படுத்தி, மிருகங்களை மையப்படுத்தி என தீப்பெட்டிகளில் பல வண்ணங்கள், பல எண்ணங்கள் என நிறைந்திருக்கிறது. 

ஊதுபத்தி நிறுவனங்கள், பீடி கம்பெனி, ஹோட்டல்கள் தங்களது நிறுவன பெயரில் தீப்பெட்டி தயார் செய்வது உண்டு. எனவே தீப்பெட்டிகளில் வகைகள் அதிகம். வெவ்வேறு ஊர்களில் வெவ்வேறு பெயர்களில், வண்ணங்களில் தீப்பெட்டிகள் உள்ளது. இவற்றை சேகரித்து பார்ப்பது ஒரு வண்ணமயமான விசயம். அதற்கு பின்னணியில் இருக்கும் பலரின் உழைப்பு கண் முன்னே வரும்.

வித்தியாசமான ஊர்கள்

ஒருங்கிணைந்த திருநெல்வேலி மாவட்டத்தில் (திருநெல்வேலி, தூத்துக்குடி & தென்காசி) நிறைய வித்தியாசமான ஊர் பெயர்கள் உண்டு. அவை நிறைய தமிழ் பெயர்ளைக் கொண்டவை. தமிழ் பெயர் அல்லாத சில ஊர் பெயர்கள் உண்டு. அவற்றின் பெயர் காரணம், பின்னணி.

பர்கிட் மாநகரம்

பர்கிட் மாநகரம், திருநெல்வேலியில் இருந்து சீவலப்பேரி சாலையில் தாமிரபரணி ஆற்றுக்கு முன்பாகவே உள்ளது. தமிழில் இந்த ஊர் புதுமனை என்று அழைக்கப்படுகிறது. 1926ல் இந்த ஊர், கலெக்டர் ஹாரோல்ட் ஹாமில்டன் பர்கிட் நினைவாக உருவாக்கப்பட்டது. இது கிராமம் தான் ஆனால் ஏன் மாநகரம் என வைக்கப்பட்டது என்று தெரியவில்லை. 

டோனாவூர்

டோனாவூர், திருநெல்வேலி மாவட்டம் களக்காடு - வள்ளியூர் / நாகர்கோவில் செல்லும் சாலையில் உள்ள ஊர். அயர்லாந்தை சேர்ந்த எமி கார்மிக்கேல் என்பவர் டோனாவூருக்கு வந்து, டோனாவூர் பெல்லோஷிப் என்ற அமைப்பை உருவாக்கினார். அது ஏழை குழந்தைகள் கல்வி மற்றும் முன்னேற்றத்திற்கு உதவியது. அந்தப் பகுதியினர் எமி கார்மிக்கேலை "அம்மா" என்றே அழைக்கின்றனர். டோனாவூரில் 1800களில் உருவாக்கப்பட்ட தேவாலயமும் உள்ளது. இந்தத் தொண்டு செய்ய பெருமளவில் உதவியவர் கவுன்ட் டோனா என்ற நபர். எனவே அவர் பெயரால் டோனாவூர் என்று அழைக்கப்படுகிறது. பல வரலாற்று சிறப்புகளை தாங்கி நிற்கும் ஊர் டோனாவூர். 

ரஸ்தா 

ரஸ்தா என்ற ஊர் திருநெல்வேலி - சங்கரன்கோவில் நெடுஞ்சாலையில் உள்ளது. ரஸ்தா ஒரு நான்கு முனை சந்திப்பு. ரஸ்தாவில் இருந்த தென்காசி செல்ல வழியுண்டு. தாழையூத்து செல்ல வழியுண்டு, தாழையூத்து சென்றால் அது மதுரை நெடுஞ்சாலையில் இணைக்கும். இன்னொரு பக்கம் திருநெல்வேலி, மற்றொரு பக்கம் சங்கரன்கோவில். ரஸ்தா என்பது சிறு கிராமமே ஏன் இந்த பெயர் வந்தது என்று தெளிவாக தெரியவில்லை. ரஸ்தா என்றால் உருது மொழியில் முக்கிய சாலை அல்லது முக்கிய பாதை என்று பொருள். 

கேம்பலாபாத் 

திருநெல்வேலி - திருச்செந்தூர் சாலையில் இருக்கிறது கேம்பலாபாத் ஊர். தாமிரபரணி கரையில் இருந்த ஒரு கிராமத்தை வெள்ளம் புரட்டிப் போட,  ஆங்கில அதிகாரி கேம்பல் என்பவர் புதிய இடம் தந்து அந்த கிராம மக்களுக்கு உதவினார். அவரது பெயரில் உருவான புதிய ஊர் கேம்பலாபாத். இஸ்லாமிய மக்கள் அதிகம் இருப்பதால் பாத் சேர்ந்து கொண்டது. 

நாசரேத்

திருநெல்வேலிக்கு வந்த மிஷனெரிகள் உருவாக்கிய ஊர் நாசரேத். இயேசு கிறிஸ்து சிறு வயதில் வாழ்ந்த ஊர் பெயரை இந்த ஊருக்கு வைத்துள்ளனர். நாசரேத் தூத்துக்குடி மாவட்டத்தில் ஆழ்வார் திருநகரி - உடன்குடி சாலையில் உள்ள ஊர். தேரிக்காடுகளுக்கு அருகில் உள்ள ஊர். 

பேட் மாநகர்

இந்த ஊரும் வெள்ளத்தில் சிக்கிய ஊரின் பதிலாக வேறு ஒரு இடத்தில் உருவான ஊர். தூத்துக்குடி சப் கலெக்டர் ஆண்டனி பேட் இந்த ஊர் உருவாக உதவியதால் பேட் மாநகர் என்று அழைக்கப்படுகிறது. பேட் மாநகர் திருவைகுண்டம் - தூத்துக்குடி சாலையில் உள்ள ஊர். 

தூசான் நினைவுகள்

தூசான் நினைவுகள் என்றதும் மேனுவல் வால்வ் டிஈஆர் (TER) தான் சக தூசான் பொறியாளர்களுக்குத் தெரியும். குறிப்பாக சந்திரன் சாருக்கும், அஜித்க்கும். அதோடு வேறு சில நினைவுகள் இங்கே. 

ஆன்லைன் சுடோகு

தூசானில் சேர்ந்த புதிதில் சேத்துப்பட்டு அலுவலகத்தில் தூணுக்குப் பின்னால் இருக்கும் கேபின் தான் எங்களுக்கு ஒதுக்கப்பட்டது. நான், கோபி, ஸ்ரீனி சார், அபிலாஷ் தான் அங்கே இருந்தோம். குட்கியும், லாராவும் நுழைந்திரா காலம் என்பதால் பெரிய வேலை இல்லை. ரொம்ப ஃபோர் அடிக்கும். அபிலாஷ் ஒருநாள் ஆன்லைன் சுடோகு விளையாடிக் கொண்டிருந்தான். அதைப் பார்த்து நானும் விளையாட நினைத்தேன். ஆர்வமாக ஒருநாள் விளையாடிக் கொண்டிருக்கும் போது பின்னால் ஐடி டீம் எச்ஓடி சங்கர் சார் நின்று கொண்டிருந்தார். எவ்வளவு நேரம் பார்த்தார் என்று தெரியவில்லை. "அவ்வளவு தான் நம்மள முடிச்சுவிட்டீங்க போங்க" என்று நினைத்தேன். அவர் எந்த நடவடிக்கையும் எடுக்கவில்லை. 

பால் குண்டன்

தூசானில் நான் சிலருக்கு பட்டப்பெயர் வைத்தாலும் பெரிய அளவில் ரீச் ஆனது பால் குண்டன் தான். அவருக்கும் எனக்கும் என்ன சம்பந்தமும் இல்லை, பிறகெப்படி பேர் வச்சேன். கிரிக்கெட் கமெண்டரியில் ஆஸ்திரேலிய வேகப்பந்து வீச்சாளர் ரியான் ஹாரிஸை மில்க் கண்டெய்னர் (Milk Container) என்றனர். அதை நான் பால் குண்டன் என்று மொழியாக்கம் செய்து கொண்டேன். அதே போல் உருவமுடைய இவர் பால் குண்டன் ஆனார். 

சுபயா

அலுவலக மெயில் ஐடியில் அப்பா பெயர் முதலில் பிறகு பணியாளர் பெயர் வருவது போல் செய்திருந்தனர். கண்ட்ரோல் வால்வ் மீட்டிங்க்கு வந்த கொரியன்கள் செந்தில் குமாரை, "குமா" "குமா" என்று அழைத்தனர். எனது பெயரையும் அப்படி தான் கூப்பிடுவார்கள் என அகமகிழ்ந்து கொண்டேன். ஒருநாள் காலையில் 8.30க்கு ஒரு போன் வந்தது, எதிர்முனையாளர் சுபா என்கிற தொனியில் ஏதோ சொன்னார். சுபாவும் இல்லை கிபாவும் இல்லை என்று வைத்து விட்டேன். பிறகு 9.30க்கு மீண்டும் போன் மிஸ்டர் சுபயா என்றது கொரியனின் குரல். நான் ஒருவாறு யூகித்து மெயிலில் உள்ள சுப்பையாவை சுபயா என்று புரிந்து பேச தொடங்கினேன். பாவம் அந்த நபர் ஒரு மணி நேரம் சுப்பையா என்ற பெயரைச் சொல்லி பார்த்து இருக்கிறார். 

மேனுவல் வால்வ் டிஈஆர்

புரகியூர்மெண்ட்க்கும் இஞ்சினியரிங்கும் யுத்தம் நடந்த காலம் அது. வெள்ளிக்கிழமை மேனுவல் வால்வ் டிஈஆர் கொடுக்க வேண்டும். எனக்கு தெரிந்து எல்லாம் முடிந்து விட்டது. வெள்ளிக்கிழமை சில மணி நேரம் வேலை பார்த்தால் முடிந்து விடுவேன் என்பதால் அதை தொடங்கவே இல்லை. இந்நிலையில் முதல் பாதி விடுப்பு எடுத்தேன். அப்போது கூட வழக்கமாக ஏழு மணிக்கு அனுப்புவது போல அனுப்பி விடலாம் என்று நினைத்தேன். வீட்டில் சிறு சண்டை நிகழ கடுப்பில் விடுப்பை முழு நாளாக்கி விட்டேன். 

அஜித் அன்று காலண்டர் பார்க்கவில்லை, பார்த்திருந்தால் நாள் முழுக்க சந்திராஷ்டமம் தெரிந்து இருக்கும். அஜித் தலையில் டிஈஆர் விழ, தல பெயர் கொண்டவர் தலையை பிய்த்துக் கொண்டது தரமான சம்பவம். 

கௌஷிக்காக குறுக்கே வந்த காதர்

நான் மூன்று முறை சைட்க்கு சென்றுள்ளேன். மூன்று முறையும் எந்த காரணமும் கிடையாது அல்லது சொல்லப்படவில்லை. குட்கி சைட் இரண்டாவது முறை சென்ற போது காதரும் உடன் வந்தார். காதர் எதையும் முன்வந்து செய்யும் ஆர்வக்கோளாறு என்பதால் ஏர்போர்ட் கார் பில், சாப்பாட்டு பில் என எல்லாத்தையும் அவரே பார்த்துக் கொள்வார். நான் போர்டிங் பாஸ் இரண்டையும் ஒட்டி கொடுத்தால் போதும். அந்த முறை சைட்க்கு சென்ற போது குவாலிட்டி ஹெட் கொரியன் ஒருவர் அழைத்தார். போய் பேசினோம். எனக்கு கேஎஸ்பியில் இருந்து கால் வர நான் போனோடு வெளியே வந்துவிட்டேன். ஸ்பூல் நிறைய டிராயிங்கோடு மேட்ச் ஆகவில்லை என்று சொல்லி இருக்கிறார்கள். 

காதர் அவர் வசம் இருந்த டிராயிங்கை எடுத்து செக் பண்ண காதர் வைத்திருந்த டிராயிங் ரிவிசன் 1ஏ, சைட் குவாலிட்டி வைத்திருந்தது ரிவிசன் 1. இதனால் தான் பிரச்சினை என அந்தக் கொரியன் 10 நிமிடங்கள் காட்டுக்கத்து கத்திவிட்டு தம் அடிக்க சென்றுவிட்டார். நான் உள்ளே சென்ற போது காதர் பாவம் போல இருந்தார். அப்புறம் நான் விவரத்தை சொன்னேன் ஐபிஆருக்காக டீடெய்ல் சேர்க்கப்பட்ட டிராயிங் 1ஏ, அதில் ஸ்பூல் எந்த மாற்றமும் இருக்காது என்று. இது தெரியாமல் அந்தக் கிழவன் திட்டிட்டான் என்றார் காதர். 

ராஜினாமா

ஒருநாள் நான் கண்ட கனவை சந்திரன் சாரிடம் சொன்னதுக்கு சந்திரன் சார் கடுப்பாகிவிட்டார். என்ன கனவுன்னா சந்திரன் சார் பேப்பர் போடுவது போன்ற கனவு. ஏன்யா உன் கனவுல கூட நான் பேப்பர் போடுவது தான் வருமா என்றார் சந்திரன் சார். 

பிளஸ்ஸருக்கு விலை பேசிய பெருசு

கொரோனா டிக்கிய பொழந்து கொண்டிருந்த காலம். பேப்பர் போட்டு விட்டதால் சம்பளம் வரவில்லை. சமாளித்து ஓட்டிக் கொண்டிருந்தேன். ஸ்ரீனி சாரிடம் இருந்து போன், சார் நீங்க பெங்களூரு போறதுனால தமிழ்நாடு ரிஜிஸ்டரேசன் வண்டியை கொண்டு போனா நிறைய பிரச்சினை வரும். அதனால வண்டிய எங்கிட்ட கொடுத்திருங்க விலை பேசிக்கலாம் என்றார். ஒகே சார் நான் பெங்களூரு போனா சொல்றேன் என்று சொல்லி வைத்துவிட்டேன். 

இப்போதைக்கு இது போதும், இன்னும் நினைவுகளின் தொடர்ச்சியை பதிவு செய்கிறேன். 

மூன்றாம் வகுப்பு புராஜெக்ட்

தொழில்நுட்பம் வளர்ந்து விட

பால்ய பசுமையை 

நினைவு கூறுகிறது மனது. 

பட்டுப்பூச்சியைப் பிடித்து

தீப்பெட்டியில் அடைத்ததும்

தட்டாம்பூச்சியைப் பிடித்து

சிறு கல்லைத் தூக்க வைத்ததும்

நினைவடுக்குகளில் நீங்காமல், 

கூழாங்கற்களை பார்த்து

பல ஆண்டுகள் ஆகிவிட்டதை

மனது கூறிக்கொள்கிறது!!! 

***

கல்லூரி ஒரே பெஞ்சில்

ஒன்றாக இருந்து, ஒன்றாக

பேசிச் சிரித்து, சேட்டைகள் செய்து

ஆசிரியரிடம் அடுத்தவர் தவறுக்கு

திட்டு வாங்கி, 

கேலி, கிண்டல்கள் செய்து 

மூன்றரை ஆண்டுகளைக்

கழித்த நால்வர். 

கனடா, கத்தார், 

பெங்களூரு, திருநெல்வேலி

என ஆளுக்கொரு திசையில். 

காலம் தான் எத்தனை வேகமாக

சுழல்கிறது!!! 

***

கல்லூரி புராஜெக்ட்க்கு

சென்னை சென்று ஊர்சுற்றி

எதேதோ செய்து

யாராரிடமோ பேசி

என்னன்னவோ ஒப்பித்து

கரையேறிய எனக்கு

மகளின் மூன்றாம் வகுப்பு

புராஜெக்ட் தலைசுற்ற

வைக்கிறது!!! 

***

கல்லூரி நண்பர்கள்

எங்கள் ஊருக்கு வரும்போது

அலைபேசி தொடர்பு எல்லையே

இல்லாமல் இருந்தது. 

சிரமப்பட்டு வந்து எங்கள்

கிராமத்தை ரசித்துச் சென்றார்கள். 

இன்றோ மீஸோ, அமேசான் என

பொருட்கள் வந்திறங்குகின்றன. 

நாலைந்து தொழிற்சாலை

பேருந்துகள் வருகிறது. 

ஏழெட்டு பள்ளிப் பேருந்துகள்

வருகிறது. 

எங்கள் ஊர் இப்போது

வளர்ந்து விட்ட கிராமம்!!! 

***

ஊழலை ஒழிக்க வந்த கட்சி

₹36க்கு தனியாரிடம்

மின்சாரம் வாங்குகிறது. 

நான்காண்டுகளுக்கு முன்பு

விடப்பட்ட இலவச நகரப்

பேருந்துகளால் இன்று

ஆட்டோகாரர்கள் வாழ்வாதாரம் 

பாதிக்கப்படுவதாக குருட்டு 

வறட்டு அரசியல் செய்யும்

எதிர்கட்சி. 

இவர்களுக்கு மத்தியில்

தெருநாய்களோடு போராடுகிறான்

தமிழன்!!! 

தோரணமலை - ஆன்மிக பயணம்

கிட்டத்தட்ட மூன்றாண்டுகளுக்குப் பிறகு தோரணமலையான் மீண்டும் என்னை அழைத்தார். இந்த முறை என்னோடு வந்தது ராம் மற்றும் பர்த்திஸ். காருக்கு டிரைவராக வந்தது அருள் மணி அண்ணன். 

காலையில் 6.30க்கே கிளம்பினோம். அம்பீஸ் கபேவில் டீ குடித்து விட்டு, ராம் மற்றும் பர்த்திஸை கூட்டிக்கொண்டு கிளம்பினோம். மேலப்பாளையம், முன்னீர்பள்ளம் வழியாக சென்று அவுட்டர் ரிங் ரோட்டில் ஏறி சுத்தமல்லி விலக்கு, கல்லூர், முக்கூடல், பொட்டல் புதூர் வழியாக கடையம் சென்றோம். கடையத்தில் காலை உணவு என்பது திட்டம். 

சிறிய ஓட்டல்கள் எதுவுமில்லை. மிகச் சிறிய ஓட்டல் இருந்தது. இரண்டு பிளாஸ்டிக் பெஞ்ச், ஒரு மர பெஞ்ச், சில பிளாஸ்டிக் ஸ்டூல்கள் இருந்த ஹோட்டல். இட்லி & தோசை இருந்தது. இட்லி சாப்பிட்டோம் நன்றாகவே இருந்தது. ராம் விரதம் என சாப்பிடவில்லை. மூன்று பேருக்கான பில் 100 தான். பக்கத்து கடையில் வாட்டர் பாட்டில், தீப்பெட்டி (புதுவரவு) வாங்கிக் கொண்டு தோரணமலையை நோக்கி விரைந்தோம். 

அடிவாரத்தில் வல்லப விநாயகர வணங்கிவிட்டு மலை ஏறத் துவங்கினால் சில குரங்குகள் நின்றன. அவற்றை பார்தது விட்டு மலை ஏறினோம். சுடோகு போட்டியை போல இந்த மலை ஏற்றமும் இலகு, மிதம் & கடினம் என மூன்று வகை. சென்ற முறை எனக்கு மிதமாக அமைந்தது. இந்த முறை கடின வகையில் இருந்தது. 

மூச்சு வாங்க, வாங்க முருகனை காண ஏறினோம். ராமுக்கு இலகு ரகம். பர்த்திஸ் & நான் ஒரே ரகம். மூவரும் ஒன்றாக துவங்கினாலும் ஏறும் போது ஒவ்வொருவரும் வெவ்வேறு படிநிலைகளில். 

எங்களோடு பூமாலை வாங்கி வந்த இரண்டு பேர் மூச்சு வாங்க சிநேக பார்வையும், சில வார்த்தைகளும் பகிர்ந்து கொண்டனர். அப்பா - மகள் ஏறினர். அவர்கள் வாங்கி வந்த வாழைப்பழத்தை குரங்குகள் வாங்கிக் கொண்டன. தண்ணீர் பாட்டிலை கூட வழிப்பறி செய்தன. 

நானும், பர்த்திஸ்ம் செய்த தவறு, சாப்பிட்ட கொஞ்ச நேரத்தில் மலை ஏறத் துவங்கியது. இன்னும் பத்து படிகள் / ஏழு  படிகள் / நான்கு படிகள் சென்றால் சமதளம் அதில் ஓய்வெடுக்கலாம் என நினைத்து. மூச்சு வாங்கினால் அந்த இடத்தில் நின்றோ, உட்கார்ந்தோ ஓய்வெடுப்பது சிறந்தது. 

மூச்சு வாங்கி, வேர்வை வழிந்து, முகம் துடைத்து ஒருவழியாக முருகன் முன் நின்றோம். சாந்த சொருபியாக முருகன் எங்களை ஆசிர்விதிக்க களைப்பு குறையத் தொடங்கியது. மலையில் மேல் மண்டபம் கட்டி செயற்கையாக்கும் முயற்சி எனக்கு சற்றே அதிர்ச்சி. 

காளியம்மனையும் கும்பிட்டு, சிறிது உட்கார்ந்து விட்டு கீழறங்க தொடங்கினோம். மேலிருந்த சுனைக்கு செல்லும் வழியே அடைத்து விட்டனர். நடுவில் இருந்த சுனையை பார்க்க சென்றோம். அதில் தண்ணீர் இல்லை. கோவில் வேலைக்காக தலையில் மூட்டைகளோடு சென்றவர்கள் எங்களை ஆச்சர்யப்படுத்தினர். 

கீழே வந்து லெமன் சோடா குடித்த பிறகு சற்றே புத்துணர்வு. ராமநதி அணையை பார்க்கலாம் என்று சென்றால் சனி, ஞாயிறு அனுமதி இல்லையாம். மீண்டும் கடையம் வந்து வேறு வழியாக ஆழ்வார்குறிச்சி, ஆம்பூர், அம்பை பைபாஸ், சேரன்மகாதேவி வழியாக வந்தோம். 

சேரன்மகாதேவியில் ஒரு தேனீர் இடைவேளை. நெல்லையை நெருங்கும் போதுகருமேகங்கள் பயங்காட்டின. புதிய பேருந்து நிலையத்தில் நுழையும் போது மழை பெய்ய துவங்கி இருந்தது. ராம் மற்றும் பர்த்திஸை இறக்கிவிட்டு வீடு சேர்ந்தேன். தோரணமலையான் விபூதி சட்டைப்பையில் உடன் வந்தது. 

குவஹாத்தியும் விக்ரமும்

ஜான் கேம்ப்பெல் ஆடியது

ருத்ர தாண்டவம். 

கேப்டன் & கீப்பர் என்ற இருமுகன்

ஹோப்பும் சதம். 

தந்து விட்டேன் என்னை

என்று அர்ப்பணிப்புடன் ஆடி

வீர தீர சூரன் ஆனார்

அமீர் ஜாங்கோ! 

இந்த ராஜபாட்டையிலும்

10 என்றதுக்குள்ளே சிறகுகள்

விரித்து பறந்தார்

ரூதர்போர்டு. 

புதிய மன்னர்கள்

பிரார், நபி எதுவும் செய்யவில்லை. 

இந்த மைதானத்தில் விக்கெட்

எடுப்பது தங்கம் எடுப்பதை

போன்றது. 

ஜடேஜாவும், குல்தீப்பும் 

தங்கலான்கள். 

மைதானம் ஹவுஸ்புல்

மைதான வெக்கையில்

தெய்வத் திருமகள் கிருஷ்ணா

கூட ஸ்வட்டரை கழட்டி விடுவார். 

அந்தியன்கள் போட்ட ஸ்கெட்சை

தகர்க்க களமிறங்கியவர்கள்

கடாரம் கொண்டான் ரோகித் &

பொன்னியின் செல்வன் கில். 

சாமி அருள் வந்து ஆடியதை

போல் ஆடினார் ரோகித். 

கில்லின் ஹேண்ட் ஐ கோர்டினேஷன்

ராவணன் போல்

புஜ வலிமை பீமா போல்

தில்லாக ஆடி தூள் கிளப்பினார். 

கிங் கோலி சிறிது நேரம் 

ஆடினாலும் சிறப்பான ஆட்டம். 

ருதுவின் ஆட்டம் காசிக்கே

கடுப்பை கிளப்பி இருக்கும். 

போட்டி முழுக்க 

பந்துக்கும் பவுண்டரிக்கும்

இடையே காதல் சடுகுடு

நடந்தது. 

இரண்டு போட்டியிலும் சில

ஓவர்கள் மட்டுமே பந்து வீசி

பேட்டிங் கிடைக்காத 

நாமன் திர் ஒரு மகான். 

கிருஷ்ணனுக்கு காத்திருந்த

பக்த மீரா போல் ஆனது

ராகுல் நிலைமை. 

இந்த மாபெரும் வெற்றியால்

மகிழ்வடைந்தார்

பிதாமகன் கம்பீர். 

எனது ஆசிரியர்கள் - 7

எனது ஆசிரியர்கள் வரிசையில் எங்கள் பள்ளியின் இயற்பியல் ஆசிரியர் சாத்ராக் ஞானதாசன். 

சமீபத்தில் ஜான்ஸ் பள்ளியில் தலைமை ஆசிரியராக இருந்த ஓய்வு பெற்ற சாத்ராக் சார். எங்கள் பள்ளிக்கு வந்தது 2000ல் நாங்கள் பத்தாம் வகுப்பு படிக்கும் போது. பத்தாம் வகுப்பில் எனது பக்கத்தில் இருந்த நண்பன் பரமசிவன் வந்து சொன்னான். பிசிக்ஸ் வாத்தியார மாத்திடாங்களாம். 12த் பசங்க மாத்தக்கூடாதுனு ஹெட் மாஸ்டர்ட பேசிட்டு இருக்காங்க என்றான். 

மாணவர்கள் விரும்பும் அந்த பிசிக்ஸ் ஆசிரியருக்கு மாற்றாக வந்தவர் சாத்ராக். மாணவர் விரும்பும் ஆசிரியராகவே இருந்தார் சாத்ராக் சார் பாடம் நடத்துவது மிகத் தெளிவாக இருக்கும். அவர் ஒரு போதும் ஒப்பேற்றுவது போல பாடம் நடத்தியது இல்லை. ஒரு வட்டம் வரைவது என்றால் கூட காம்பஸ் எடுத்துவரச் சொல்லி தெளிவாக வட்டம் போட்டு நடத்துவார். 

அதே போல் ஜோதிராஜ் ஒரு ரயிலில் இருக்கான், ஜோதிகா ஒரு ரயிலில் இருக்காங்க. ஜோதிகா இருக்கற ரயில் நகருது. ஜோதிராஜ்க்கு தன்னோட ரயில நகர்ற மாதிரி தோணும். இதுதான் அப்படினு பாடத்திற்கு நுழைவார். 

சாத்ராக் சார் எல்லாரையும் மரியாதையுடன் நடத்துவார். லேப் இன் சார்ஜ் உதயகுமார் சாரை உதயகுமார் சார் என்றே அழைப்பார். அவருக்கு உதவியாளராக வந்த ராபினை ராபின் சார் என்றே அழைப்பார். அதை சமயத்தில் அடி வெளுத்து விடுவார். 

மாலையில் பிரேயர் மைதானத்தில் நடக்கும் பால் பேட்மிண்டன் போட்டிகளில் சாத்ராக் சார் ஆடும் ஆட்டம் ஜாலியாக ரசிக்கும் வண்ணம் இருக்கும். சர்வீஸ் போட்டால் கூட பந்தை உயரமாக தூக்கி அடிப்பார். 

உடை விசயத்திலும் சாத்ராக் சார் முன்னோடி, டக் இன் பண்ணி, ஷூ போட்டு தான் பள்ளிக்கு வருவார். அதை போல் ஒருமுறை போட்ட சட்டையை மறுமுறை போட்டு பார்க்க முடியாது. 

பாடம் நடத்தும் போது சந்தேகம் கேட்டாலும் தெளிவாக விளக்குவார். இன்றும் என்னை சுத்தி தொடரும் E =mC2 அவர் சொல்லித் தந்தது தான். அவர் இயற்பியல் பாட ஆசிரியராக இருந்ததால் இயற்பியலுக்கு தனியாக டியூசன் செல்ல தேவை ஏற்படவில்லை. 

பள்ளிப் படிப்பை முடித்த பிறகு சாத்ராக் சார் பார்க்கவே இல்லை. நீண்ட நாட்களுக்குப் பிறகு சாத்ராக் சார் எங்கள் பள்ளி தலைமை ஆசிரியர் என்று செய்தி தாளில் பார்த்த போது மகிழ்வாக இருந்தது. பள்ளிக்குப் போய் பார்க்கலாம் என்று நினைத்தேன். அவர் ஓய்வு பெற்று விட்டதாக தகவல் கிடைத்தது. 

என்றாவது சந்திப்பேன் எங்கள் சாத்ராக் சாரை....