எனது எழுத்தார்வம் காரணமாக தொடர்ந்து ஏதாவது ஒரு தலைப்பில் எழுத ஆசை வந்தது. அதன் காரணமாக எனது ஆசிரியர்கள் குறித்து எழுதுகிறேன்.
ஏற்கனவே பள்ளி ஆசிரியர் குறித்து எழுதிவிட்ட நிலையில் 2வதாக கல்லூரி ஆசிரியர். கல்லூரி ஆசிரியர்களில் இவரை ஏன் முதலில் எழுத வேண்டும்? தனிப்பட்ட காரணங்கள் எதுவும் இல்லை. சாதாரணமான தேர்வு தான்.
விரிவுரையாளராக இருந்து தற்போது கடல்சார் பொறியியல் துறை தலைவராக இருக்கும் ஜான் லியோன் சார் தான் அவர். எனது முதல் செமஸ்டரின் போது எனது அறைத்தோழன் சரவணன் மற்றும் பக்கத்து அறைத்தோழன் சுந்தர் ஜெகன் இருவரும் பி பிரிவு. பி பிரிவுக்கு இஞ்சினியரிங் மெக்கானிக்ஸ் வகுப்பெடுத்தவர் ஜான் லியோன். முதல் செமஸ்டரில் ஜான் லியோன் குறித்து விடுதி அறையில் பேச்சுகள் நடக்கும்.
சுந்தர் ஜெகன் பொதுவாக மற்றவர்களின் உடை நேர்த்தி மற்றும் சட்டைகளின் நிறத்தை ரசித்து அதே நிறத்தில் வாங்க வேண்டும் என்று நினைப்பவன். ஜான் லியோன் சார் உடை நேர்த்தியாக அணிபவர்.
ஏதோ ஒரு தேர்வின் போது தேர்வு அறையில் அவரது அடையாள அட்டை மூலமாக அவர் தான் ஜான் லியோன் எனத் தெரிந்து கொண்டேன். எங்களுக்கு அவர் வகுப்பு எடுத்தது 4வது செமஸ்டரில் மட்டுமே.
வகுப்பு அறையில் நுழையும் போதே பாடத்தை ஆரம்பித்துவிடுவார். பாடத்தைத் தாண்டி எதுவும் பேசமாட்டார். ஆனால் யாருக்கும் கவனம் சிதறாமல் கவனிக்க வைத்துவிடுவார். 50 நிமிடங்கள் போவதே தெரியாது என்பது அவரது வகுப்பின் சிறப்பு.
ஹோம் வொர்க் கொடுப்பார், சில நேரங்களில் ஹோம் வொர்க் பண்ணியிருக்க மாட்டீங்க என்று அடுத்த நாளில் அந்த ஹோம் ஒர்க்கை விளக்குவார். ஆங்கிலத்தில் தான் வகுப்பெடுப்பார். தமிழில் எப்போதாவது பேசுவார், அது மார்த்தாண்டம் தமிழ்.
எங்களுக்கு ஸ்டாப் அட்வைசராக இருந்தார். விடுப்பு எடுத்தால் அவரிடம் தான் விண்ணப்பம் கொடுக்க வேண்டும். ஒரு முறை என்னை கூப்பிட்டுவிட்டார். ஸ்டாப் ரூம்க்கு சென்று பார்த்தேன். குறிப்பிட்ட தேதியை சொல்லி அன்று ஹால்ப் டே கட் அடிச்சியா என்றார். இல்ல சார் ஹால்ப் டே லீவு போட்டேன் என்றேன். எல்லாம் ஒண்ணு தான் லீவு பார்ம் கொண்டு வா என்றார். அதற்குப் பிறகு நானும் சாகுலும் சீரான இடைவெளியில் லீவ் பார்ம் கொடுத்து விடுவோம்.
ஒருமுறை என்எஸ்எஸ்க்கு சென்றதால் என்எஸ்எஸ் ஆசிரியர் அழகேசனிடம் லீவு பார்ம்ல் கையெழுத்து வாங்கி கொடுத்தோம். அழகேசன் சார் பக்கத்து கேபினில் இருப்பவர். யோவ், "நீரா வே சைன் போட்டு கொடுத்தீரு" என்று விளக்கம் கேட்டு கொண்டார்.
4வது செமஸ்டருக்குப் பிறகு அவர் எங்களுக்கு வகுப்பு எடுத்தது இல்லை. எங்களோடு டூர் வந்ததும் இல்லை. ஆனாலும் அவர் மேல் எப்போதும் மரியாதை உண்டு.
மெக்கானிக் இஞ்சினியரிங்கில் புரியும் படியாக, அதே சமயம் சலிப்பு தட்டாமல் வகுப்பு எடுப்பவர்களில் ஜான் லியோனும் ஒருவர். ஆடை நேர்த்தி அவரை ஒரு ஹீரோ போல காட்டும்.
