இயற்கை எழில் கொஞ்சும்
இடத்தில் கல்லூரி அமைவது
எல்லாருக்கும் வாய்ப்பதில்லை !
விடுதிக்கும் கல்லூரி
வளாகத்துக்குமான இடைவெளியில்
ஒரு வாய்கால்
அதில் நீச்சல் கற்றோர் ஏராளம் !
அருகில் இருக்கும் கோவிலுக்கு
அனைவரும் சென்றோம்
மதங்களை கடந்து !
குளத்தை பார்த்து இருக்கைகள்
போடப்பட்டிருக்கும் ஸ்வாதி
பூங்காவிற்கு காதலியோடு
செல்ல எல்லாருக்கும்
கனவிருந்தது !
மேலிருக்கும் கேண்டீனின்
தேநீருக்கும்
விடுதியிலிருக்கும் கேண்டீனின்
ஹனி கேக்கிற்கும் மனம்
ஏங்கி கிடக்கும் !
கிரிக்கெட் விளையாட
சிமெண்ட் தரை
கிரிக்கெட் பார்க்க
தாத்தா கடை !
திங்கட்கிழமையின் புரோட்டாவும்
ஞாயிற்றுக்கிழமையின் பூரியும்
விடுதியில் ருசித்தவை !
கல்லூரி நாளும்
கூடைப்பந்தாட்ட தொடரும்
கல்லூரியில் ரசித்தவை !
வெல்கம் பார்ட்டிக்கு பிறகு
வித்தியாசமானவர்களாக மாறி
லேப் விட்டு வெளிவரும் போதே
யூனிபார்ம் சட்டையை
வாங்கி போட்டு சென்ற
அண்ணன்கள் அழகானவர்கள் !
நம்மையும் நம்பி
புத்தகம் நோட்ஸ் விளக்கம்
கேட்ட தம்பிகள்
விவரமானவர்கள் !
ஆட்டோகிராப் என
நாலு டைரிகளில் எழுதி
வாங்கி கொண்டு
ஆளுக்கொரு திசையில்
பயணித்தோம் !
சில திருமணங்களில் சந்தித்தோம் !
வாட்சப்பும் பேஸ்புக்கும்
இருப்பை காட்டுகிறது !
என்றாவது சந்தித்தால்
மாப்ள, மச்சான் என்று
பேசிக் கொள்வோம்
மலரும் நினைவுகளை !!!
No comments:
Post a Comment